AMERICA:అమెరికా సెనెటర్ బిల్ హాగెర్టీ చేసిన తాజా వ్యాఖ్యలు భారత్-చైనా సంబంధాలపై మళ్లీ దృష్టిని సారించాయి. ఆయన ఆరోపణల ప్రకారం, ఐదేళ్ల క్రితం సరిహద్దు ఘర్షణ సమయంలో చైనా భారత సైనికులను బలహీనపర్చేందుకు విద్యుదయస్కాంత (Electromagnetic) ఆయుధాలను వాడిందని చెప్పారు. ఇది పరోక్షంగా 2020 గల్వాన్ లోయ ఘటనను సూచిస్తోందని విశ్లేషకులు భావిస్తున్నారు.
తెలుసుకున్నట్లుగా, గల్వాన్లో భారత్-చైనా సైనికుల మధ్య రాళ్లు, కర్రలతో జరిగిన ఘర్షణలో 20 మంది భారత జవాన్లు ప్రాణాలు కోల్పోగా, చైనా ఐదుగురు సైనికుల మృతి జరిగిందని అధికారికంగా ప్రకటించింది. అయితే, అసలు సంఖ్య మరింత ఎక్కువే అని పలు అంతర్జాతీయ మీడియా సంస్థలు రాసాయి. ఈ ఘర్షణ తర్వాత రెండు దేశాల సంబంధాలు తీవ్రంగా దెబ్బతిన్నాయి.
ఇటీవలి కాలంలో మాత్రం ఉద్రిక్తతలు తగ్గేలా కొన్ని ఒప్పందాలు కుదిరాయి. ఎల్ఏసీ వెంబడి 2020 నాటి యథాస్థితి కొనసాగించాలనే నిర్ణయం తీసుకున్నారు. ఇరు దేశాల సైనికులు అప్పట్లో గస్తీ చేసిన ప్రాంతాలకు స్వేచ్ఛగా వెళ్లే పరిస్థితి ఏర్పడింది. ఈ నేపథ్యంలోనే ఏడేళ్ల తర్వాత ప్రధాని నరేంద్ర మోదీ చైనాను సందర్శించి ఎస్సీఓ సదస్సులో పాల్గొన్నారు. చైనా అధ్యక్షుడు షీ జిన్పింగ్తో సమావేశమయ్యారు.
ఈ పరిణామం అమెరికాకు మాత్రం అనూహ్యంగా అనిపించింది. ఎందుకంటే, అమెరికా అధ్యక్షుడు డొనాల్డ్ ట్రంప్ ఆ సమయంలో భారత్పై సుంకాల ఒత్తిడి పెంచుతున్నారు. ఈ సమయంలో భారత్-చైనా మధ్య సాన్నిహిత్యం పెరగడం అమెరికా వ్యూహాలకు షాక్గా మారింది. అందుకే బిల్ హాగెర్టీ వ్యాఖ్యలు మరింత ప్రాధాన్యం సంతరించుకున్నాయి.
గమనించ దగ్గ విషయం ఏమిటంటే, ఇటీవల అమెరికా రాయబారి సెర్గీ గోర్ కూడా భారత్ను చైనాకు దూరం చేసి తమవైపు తిప్పుకోవడమే ముఖ్య లక్ష్యమని స్పష్టం చేశారు. భారతదేశం అమెరికా చమురు, పెట్రోలియం ఉత్పత్తులు, ఎల్ఎన్జీకి కీలక మార్కెట్గా మారాలని కోరుకుంటున్నట్లు తెలిపారు. కొనసాగుతున్న వాణిజ్య చర్చలు కూడా అదే దిశగా సాగుతున్నాయని చెప్పారు.
